Sinau Ngarang Crita

Kahanan Ana Sakupenge Embung

Dhek Jumat, 20 Maret 2015, aku lunga menyang embung marga ana tugas nyritakake kahanan ana ing kana. Saliyane kuwi aku ana kegiyatan kelompokan karo kanca-kanca. Sawise tekan embung, kahanan ana kana lumayan rame lan katon asri. Iku marga wit-witan sing katon rembuyung lan ana petugas sing lagi nyapu uga ngresiki godhong-godhong sing padha nyemplung ing pinggiran kolam.

Petugas sing ngresiki embung iku okeh banget lan wis dibagi nggon-nggonane sing arep padha diresiki. Nanging kesadharan masyarakat sing padha menyang embung durung enek, marga isih ana sing ngguwak sampah ana ing kolam. Akibate ora suwe kolam kuwi mau cepet reged amarga sampah sing diguwak menyang kolam. Kurang anane wadhah sampah nyebabke masyarakat padha ngguwaki sampah ing kolam.

Kahanan embung sing kerep ditekani wong akeh, kudune wadhah sampah iku wajib ana. Amarga yen ngguwaki sampah menyang kolam terus-terusan bisa nyebabke banyu ning embung dadi tercemar lan uga bisa nyebabke penyakit. Ekosistem sing ning njero kolam uga melu terancam. Saliyane ana petugas sing gaweyane ngresiki embung uga ana wong sing padha mancing iwak ana kono.

Ing embung kono iwake macem-macem, ana sing gedhe lan uga ana sing cilik. Wong mancing iku padha pindah-pindah nganti entuk iwak okeh. Amarga nggone sing katon penak lan eyub banget, wong-wong sing padha mancing iku betah anggone golek iwak. Nganti aku mulih saka embung isih padha mancing. Ing pinggiran embung uga ana sing padha lulungguhan, mahasiswa padha nyantai ana embung lan ana bocah mulih sekolah padha mampir kono.

Wit-witan sing katon okeh gawe eyubing kahanan ing sekitar embung. Mula ora sithik sing padha nganakake kegiyatan ing perangan embung kono uga ana sing padha dolan utawa nongkrong. Wektu kuwi ana ing gazebo embung uga ana mahasiswa sing lulungguhan ana kono karo padha ngobrol, nggarap tugas, lan uga kanggo kegiatan diskusi. Nalika ana embung aku ngerti bocah cilik padha dolanan bebarengan. Ana kono bocah-bocah kuwi mau padha playon, ana sing nggawa pancing kanggo golek iwak ning kolam. Bocah-bocah kuwi katon seneng banget anggone padha dolanan ing perangan embung. Pancen embung ora tau sepi uwong, embung bisa kanggo kegiyatan apa wae.

Ana embung aku lan kanca-kanca banjur padha nggarap tugas kelompok. Manggone ing embung tengah merga wis padha lunga dadi rada sela. Ana kono padha ngrembug tugas nganalisis lan uga gawe makalah. Karo nggarap tugas, aku weruh wong sing padha mancing mau entuk iwak okeh banget tur gedhe-gedhe.